While Workin At Subway

by Sara Clark

The shaidae on the wall wis sae beautifu -
Licht gowden neuks wi ebony leafs a-flauchter,
Sae bonnie, as ah passt, ah nearlins gasped.
Ah let it daidle a seicont in ma mynd -
Gan doun the stair tae fesh the dough,
Hauntit bi the cantie tints o gowd,
An widdie-wands o black that birlt sae merrily.
Fae a stymie, ah’d stuid in feudal Japan,
Govin intae a glowin paper screen,
As empie-free as they daurk brainches.
When ah clammert back, nae sign o sun bade oan
An the wall wis dour an flat - a thing to claucht us in.