Poem at the Simmer Solstice

by Donald Adamson

Whan a bodie gaes frae us
whase days on airth hae been lang
and fu o love and creativity
and jye gien tae ithers
dule at the passin seems unnecessar:
mair like we’ll dicht a tear or twae
and say ‘truly, yon’s a life weel lived’
and, gratefu, wish God speed.

Yit there's a pairt o us
that in the perly lucent licht
o a midsimmer mornin
leuks ontae the mirror o the loch
and disnae say ‘Eneuch, 
noo let’s hae the dreich days drawin in’
raither ‘Gin licht as braw as this 
wuid nivver end.’