Northwords Now

New writing, fresh from Scotland and the wider North
Sgrìobhadh ùr à Alba agus an Àird a Tuath

editor@northwordsnow.co.uk Twitter Facebook Search

Bidh Mi Alright

by Lisa NicDhòmhnaill

Bidh mi alright.

Dùsgadh geur na h-oidhche duirche dlùithe,
Fo mhulad, fo bhròn, fo dheòir
Cràdh mo chridhe gam sgiùrsadh
Nam aonar san dorchadas carach cruaidh ach

Bidh mi alright.

Goirteas searbh mum thimcheall
Far an robh do ghàirdeanan
Nan cearcall blàth sàbhailteachd
‘S iad gam chumail ciùin dòigheil gaolach ach

Bidh mi alright.

Dòchas mo chridhe ‘s mo bheatha
Mar eunlaith nan speur a’ ceilearadh
Air tuiteam gu làr le truime chloiche
‘S air spreidheadh na phìosan ach

Bidh mi alright.

Thig an latha, ‘s mi le aoibhneas is sunnd
No fo eagal ‘s fo fhiamh
Air mo chur ri chèile a-rithist
A’ feuchainn às ùr, a’ cumail a’ dol.

Bidh mi alright.

Northwords Now acknowledges the vital support of Creative Scotland and Bòrd na Gàidhlig.
ISSN 1750-7928 - Print Design by Gustaf Eriksson - Website by Plexus Media