Càirdeas

by Deborah Moffatt

Is tusa an iarmailt,
caochlaideach, luaineach,

mise an talamh,
bunaiteach, daingeann,

tu a’ ghrian
a’ blàthachadh nan achadh,

mise an t-arbhar
gam ghrianadh fhèin nad sholas,    

tu an t-uisge
a’ fliuchadh na talmhainn,

mise an abhainn
a’ giùlan a’ bhùirn dhan mhuir,

tu a’ ghaoth
a’ sèideadh às gach àird,

mise a’ chraobh-beithe
a’ luasgadh anns an oiteig,

tu an sneachd
a’ cur  ’s a’ cathadh air na beanntan,

mise an t-eigh-shruth
nam laighe air mullach na beinne,

thu na rionnagan
a’ boillsgeach san speur,

mise a’ choinneal
a’ priobadh san uinneig,

thu a’ ghealach làn
air oidhche dhorcha fhuar,

mise an t-aodann bàn
dhen chluasaig fo do cheann.