Air a’ Chladach

by Ceitidh Chaimbeul

1921
Às dèidh rotach Bhealltainn
làgarsaid a’ fàgail smòt ann an rabhainn grinn.
Dithis a’ cruthachadh mhaoisean ann an craidhlean-droma
agus sluaisreadh cunbhalach nan cluasan,
ri sireadh a-measg na sgùillich.
Toradh-tuinn a’ fàs bàrr-bìdh na croite.
Crom, a’ togail probach, tha iad ag obair gualainn ri gualainn
irisean rin teannachadh trom.

An-diugh
Corragan a’ smeangladh criomagan
sa ghainmhich ’s a’ ghaoth ga greasadh.
Cuachag a’ cruthachadh sligean
gun adhbhar ach brèaghachadh.
Air uideal mar an drìlleach
a dh’fhalmaich iad.
Gach maighdeag air sgrùdadh
feuch am faighear an cruth is dath ceart.